“शशिना च निशा”-इतिवत्-
गुरुणा वटवो वटुभिश्च गुरुर्
गुरुणा वटुभिश्च विभाति कुलम्।
कलिभिर् भ्रमरा भ्रमरैश्च कलिः
कलिभिर् भ्रमरैश्च विभाति वनम्॥१
कविना रसिका रसिकैश्च कविः
कविना रसिकैश्च विभाति महः।
हरिणा च रमा रमया च हरिर्
हरिणा रमया च विभाति जगत्॥२
महः=उत्सवः
वणिजा द्रविणं द्रविणेन वणिक्
वणिजा द्रविणेन च भाति पुरः।
मसिना कलमः कलमेन मसिर्
मसिना कलमेन च भाति जनः॥३
धनुषा विशिखा विशिखैश्च धनुर्
धनुषा विशिखैश्च विभाति भटः।
भवता यदहं च मयैव भवान्
भवता च मया च विभाति गणः॥४
शशिना च शरच्छरदा च शशी
शशिना शरदा च विभाति निशा।
सुहृदा प्रणयः प्रणयेन सुहृत्
सुहृदा प्रणयेन च भाति सखा॥५
कलया निपुणो निपुणेन कला
कलया निपुणेन च भाति सभा।
कृपया विदुषां कृपया सुहृदां
कृपया हि गिरश्च विभामि सदा॥६